પરિચય – ‘સૈફ’ પાલનપુરી

અમારી જિંદગીનો આ સરળ સીધો પરિચય છે,
રુદનમાં વાસ્તવિકતા છે – ને હસવામાં અભિનય છે.

તમે આવો તો એને પણ જરા ઠપકા સમું લાગે,
આ મારું મન, ઘણાં વર્ષોથી મારામાં જ તન્મય છે.

તને મળવાનો છું હું એટલે હમણાં તો ચૂપ છું પણ
ખુદા તારા વિશે મારાય મનમાં સ્હેજ સંશય છે.

મને જોઈ નજરને શું સિફતથી ફેરવી લ્યો છો !
તમારી તો ઉપેક્ષા પણ ખરેખર બહુ કળામય છે.

હવે ક્યાં આગ્રહ છે કે ‘સૈફ’ સાકી હો મદિરા હો,
હવે તો શાંત ખૂણો પણ મળે તો એ સુરાલય છે.

Advertisements

2 responses to “પરિચય – ‘સૈફ’ પાલનપુરી

  1. Nice creation. I am fan of Mr. Saif Palanpuri. Mya faviourite one:
    જીવનની સમીસાંજે મારે
    જખ્મોની યાદી જોવી’તી,
    બહુ ઓછા પાનાં જોઇ શક્યો,
    બહુ અંગત અંગત નામ હતાં.